Araka ny filazan'ny fikambanana Amerikana tsy mitady tombony Plastic Oceans International, plastika maherin'ny 10 tapitrisa taonina no ariana any an-dranomasina isan-taona. Araka ny National Geographic, mety haharitra 400 taona mahery ny plastika vao simba. Hatramin'ny tapaky ny taona 1900, plastika 8,3 miliara taonina no novokarina maneran-tany. Ahoana ny fanariana fako plastika be dia be? Nahavery hevitra ny mpahay siansa nandritra ny taona maro io fanontaniana io.
BioLogiQ, hatramin'ny niorenany tamin'ny taona 2011, dia niasa tamin'ny famoronana vokatra plastika miaro ny tontolo iainana avy amin'ny akora azo havaozina. “[…] Nanomboka nanamboatra plastika avy amin'ny fako ovy izahay, indrindra avy amin'ny hydroéthylamidon,” hoy ny tale jeneralin'ny BioLogiQ Stephen Sherman vao haingana tamin'ny Idaho Statesman.
Ny plastika nentim-paharazana dia vita amin'ny polymère, akora vita amin'ny molekiola lehibe izay miverimberina matetika, toy ny polyethylene sy polystyrene. Mety haharitra an-jatony taona ireo polymère ireo vao ho simba.
Ny BioLogiQ dia mametraka ny "teknolojia iQ" azy manokana, izay misy ny fampiasana additives toy ny ovy sy ny katsaka na ny glycerine voajanahary azo avy amin'ny menaka anana sy ny tavin'ny biby amin'ny famokarana plastika.
Ny plastika aterany dia mihalevona haingana kokoa satria mora kokoa amin'ny zavamiaina bitika ny fandravana akora toy ny hydroéthylamidon sy ny glycérine.